Волоколамскиот Митрополит г. Иларион при неодамнешната посета на Ватикан, со папата Франциск разговарал за дејствијата на украинските грко-католици. Во соопштението објавено од Одделот за надворешни црковни работи на Московската Патријаршија, се вели дека Митрополитот ја споделил неговата длабока загриженост поради вклучувањето на украинската Грко-католичка црква во политичкиот конфликт, и тоа од страната на силите кои се непријателски насочени кон Руската православна црква. Понатаму, тој изразил надеж дека украинските унијати ќе ја променат оваа пракса и повеќе нема да носат еднострани и исполитизирани изјави, поддржувајќи ја постоечката шизма.
Алфеев го запознал понтифот со ситуацијата во источна Украина, каде што се убиени тројца свештеници и над 50 цркви се делумно или целосно уништени. Според него, „конфликтот во оваа земја, со кој илјадници луѓе ги загубија своите животи, од самиот почеток доби верска димензија, а украинската Грко-католичка црква одигра значајна улога во неговото разгорување.“
Извор: Московска Патријаршија