Московската Патријаршија уште еднаш ја изрази својата загриженост околу поддршката што украинските Унијати им ја даваат на украинските радикали.
– Кога започна да се пролева крв и паднаа првите жртви по улиците на Киев и другите градови во Украина, епископатот и свештенството на Украинската грко-католичка црква повика на зголемување на насилството. Заедно со неколку шизматични и псевдо-црковни структури, тие ги поддржаа екстремистичките националистички групи – изјави јеромонах Стефан Игумнов, Секретар на Одделот за надворешни црковни врски на РПЦ-МП во интервјуто дадено за еден руски весник.
Според него, претставниците на Унијатската црква честопати агресивно се изразуваат во врска со Православната Црква: „Како што знаеме, многу православни свештеници и членови на нивните семејства беа изложени на насилство од страна на националистите кои се поддржани од Унијатите и шизматиците. Украинската грко-католичка црква не сопре со таквата агресивна реторика дури и во деновите кога во источна Украина беше воспоставено кревко примирје.“
Според Секретарот, минатиот месец Унијатскиот Синод излегол со став кој повикува на уште поголема радикализација на конфликтот: „Оваа ситуација нè враќа назад во деведесеттите години од минатиот век, кога Унијатите ги искористија политичките промени во западна Украина и Источна Европа и започнаа да ги запоседнуваат православните цркви, гонејќи и убивајќи свештеници.“
Извор: Правмир