Да бевте од овој свет, тогаш светот ќе го љубеше своето;
но бидејќи не сте од светот, туку Јас ве избрав од светот – затоа светот и ве мрази.
Помнете ги зборовите што ви ги реков Јас: ниеден слуга не е поголем од својот господар.
Ако Мене Ме гонеа, и вас ќе ве гонат; ако Моите зборови ги запазеа, и вашите ќе ги запазат.
Јн. 15,19-20
Овие зборови на Господ Исус Христос им биле упатени не само на Неговите апостоли, туку и на сите оние кои Тој честопати ги нарекувал Свое мало стадо. А тоа мало стадо го сочинуваат сите оние што веруваат во Господа Исуса Христа и Неговиот закон го имаат впишано во своите срца – законот на љубовта и блаженствата, кои пак се исполнување на Неговите заповеди.
Во ова Господово мало стадо, мачениците светат како најсјајни ѕвезди, и ни служат како пример на најдлабока вера, безгранична љубов и себеодрекнување преку страданија, непоимливи маки и измачувања.
Во бројното множество на свети маченици, чиј број надминува десетици илјади, се истакнуваат великомачениците, односно оние што претрпеле исклучително ужасни мачења за Христа, и чии маки имаат најголемо значење за целиот христијански свет. А меѓу овие великомаченици, светиот Георгиј Победоносец, кого денес го празнуваме, се истакнува како еден од највеликите.
+++
Мачениците не се плашеле од никого и од ништо; мачениците не биле заведени од никого и од ништо.
Царот Диоклецијан, мачителот на св. Георгиј, многу го сакал овој свој војник, кого го сметал за еден од своите најхрабри и најважни воини. Кога видел дека ни со најостри маки нема да може да ја скрши неговата вера во Христа, тој дури и му го понудил на Георгиј второто место во великото Римско Царство. Потребно било само Георгиј да им принесе жртва на римските идоли.
Но, св. Георгиј ја презрел оваа негова понуда; секако, тој ја отфрлил понудата да биде најславен и најпочитуван веднаш после римскиот император, затоа што неговата верност кон Христа била поцврста од дијамант, а љубовта кон Него – безгранична.
+++
Св. Георгиј Победоносец не се плашел од ништо. Но дали ние, слабите и безвредни христијани, на ист начин се справуваме доколку сме соочени со било каков предизвик, макар бил и стопати помал од неговите?
Зарем не сме склони да им се поклонуваме на безвредните и минливи бокчиња од овој свет, наместо на Вечниот Бог? Дали навистина патот што Христос ни го покажа ни е единствена цел во животот? Дали вистински и секогаш се сеќаваме на Христовите зборови: „Јас сум Патот, Вистината и Животот“?
За светиот маченик и победоносец Георгиј, Христос навистина бил Патот и Животот. Тој не следел ниту еден друг пат, ниту сакал да знае за некаков друг пат. Не се плашел ниту од закани, ниту од заплашувања, и храбро го следел Христовиот пат.
Затоа, ги почитуваме сите маченици, и особено великомаченикот Георгиј победоносец, фалејќи ја неговата верна љубов кон Бога. Да Го возљубиме Господа Исуса Христа и Неговите маченици со сето свое срце, и особено св. Георгиј Победоносец, чијшто спомен денес му го празнуваме. Амин.
извадоци од беседата изговорена
на 23 април / 6 мај 1954 година
од Архиепископот симфериополски, св. Лука